რჩევები სააბაზანო ოთახის იდეალურად მოსაწყობად.
მრავლის მთქმელი ინტერიერის ამოსავალი წერტილი კედლებისა და იატაკის გამორჩეული, განსაკუთრებულად დახვეწილი ფაქტურაა. ხარისხი, მასალა, ზედაპირის დამუშავება, ყველაფერი ის, რაც მფლობელის ინდივიდუალიზმს უსვამს ხაზს. სადაც ყველა დეტალი განკუთვნილია სრული ჰარმონიისა და ეფექტურობის მისაღწევად.
ჩვენი საცხოვრებლის ერთ-ერთი უმნიშვნელოვანესი ნაწილი სააბაზანო ოთახია, ადგილი, სადაც დილისა და ღამის რუტინას ვუთმობთ დროს. სისუფთავესთან და სილამაზესთან ერთად ეს ოთახი ჩვენთვის კომფორტული და მოსახერხებელიც უნდა იყოს.
თუ თქვენს ბინაში სააბაზანო ოთახს შედარებით პატარა ფართი აქვს გამოყოფილი, გასწავლით რამოდენიმე ხრიკს, რის მიხედვითაც მეტად ეფექტურად აითვისებთ სივრცეს.
პირველი ნაბიჯი, სწორედ, ფილების შერჩევაა, ფერისა და ფაქტურის გათვალისწინებით. მუქი და ორნამენტებით გადატვირთული კედლები ოთახს ძალიან დააპატარავებს, ამიტომ გირჩევთ, არჩევანი ნათელ და თბილ ფერებზე შეაჩეროთ. პოპულარობით სარგებლობს კერამიკული ფილები თეთრისა და კრემისფერის, ან თეთრისა და ღია ნაცრისფერის კომბინაციებით.
თუ ეს ფერები თქვენთვის საინტერესო არ არის, მაშინ შეგიძლიათ ბაცი, პასტელური ტონებით მოაპირკეთოთ აბაზანა და მცირე დეტალები კაშკაშა ფერებითაც დატვირთოთ.
თუ თქვენი სააბაზანო ოთახი მცირე ზომისაა, ერთი ნათურის დამონტაჟებით ნუ შემოიფარგლებით, მართალია საგნებისა და აბაზანის ავეჯის გარჩევისთვის ერთი ნათურაც საკმარისია, თუმცა სივრცეს ერთიორად ზრდის ბევრი და სწორად განთავსებული ნათურები. აუცილებლად გაანათეთ სარკე და დიზაინის ის ელემენტები, რომლებიც განსაკუთრებით მოგწონთ და გეამაყებათ.
პატარა სივრცის მქონე ოთახებში ნაკლებადაა ცალკე მდგომი აბაზანის ადგილი, ამიტომ უპირატესობას კაბინებს ან მინით გადატიხრულ საშხაპეებს ანიჭებენ. ეს დეტალი თქვენი გადასაწყვეტია, უკვე გამზადებულ და აწყობილ კაბინას დაამონტაჟებთ, თუ თავად მოარგებთ თქვენს აბაზანას ზომებს და მინებით გადატიხრავთ.
მნიშვნელოვანია სააბაზანოს ავეჯი, ეცადეთ ნიჟარის სადგამი და სარკე ერთმანეთს შეუხამოთ, ისევე როგორც შემრევები, საშრობი და საკიდები.
პატარა აბაზანისთვის იდეალური ვარიანტია უნიტაზი ჩასაშენებელი ჩამრეცხი მექანიზმით.
იმისათვის, რომ რემონტმა დიდხანს გაგიძლოთ, აუცილებელია გაითვალისწინოთ როგორ ჭერს გააკეთებთ. სააბაზანო ოთახში ვიზუალური მხარის გარდა ყურადღება უნდა მიაქციოთ მასალის მდგრადობასა და გამძლეობას განსაკუთრებული ტენიანობისას. სააბაზანოში ზუსტად ჭერია ის ადგილი, სადაც წყლის წვეთები და სისველე გროვდება, ამან კი შესაძლოა ადვილად დააზიანოს ზედაპირი და თავიდან გახდეს გასაკეთებელი.
თუ თქვენი სააბაზანო ფანჯრიანია და ოთახში დღის სინათლე თავისუფლად აღწევს, არ დაგავიწყდეთ მცენარეები, ისევე როგორ სახლის დანარჩენ ოთახებს, მცენარეები სააბაზანოსაც ძალიან უხდება. ქოთანი აუცილებლად საერთო ინტერიერს შეუხამეთ და გვერწმუნეთ, მწვანე ბინადარი ნამდვილად გამოაცოცხლებს ოთახს
