როგორ შევარჩიოთ სამზარეულოს ნიჟარა?

სამზარეულო ნებისმიერი სახლის ბირთვი და ადამიანების თავშეყრის ადგილია. დროის გასატარებლად, ამ ერთ-ერთ ყველაზე კომფორტულ სივრცეში, მეგობრებთან ერთად ვსვამთ ყავას, ოჯახის წევრებთან ერთად ვამზადებთ სადილს, აღვნიშნავთ წარმატებას ან უბრალოდ, ვტკბებით საკუთარი თავისთვის მოწყობილი განტვირთვის დღით. სწორედ ამიტომ, სამზარეულოს მოწყობისას, თითოეული დეტალის სწორად დაგეგმვას, გადამწყვეტი მნიშვნელობა აქვს. მათ შორის კი, სამზარეულოს ნიჟარა ჩვენი კომფორტის განუყოფელი ნაწილია.  იდეალური სამზარეულოს ნიჟარა, როგორც წესი, ავსებს ინტერიერის დიზაინის ჩანაფიქრს და ამასთან ერთად, ჩვენი ყოველდღიური საჭიროებების დაკმაყოფილებასაც განაპირობებს. 

თუ სახლის მოწყობას ახლა აპირებ, მაშინ, იცოდე, რომ სამზარეულოს ნიჟარას მნიშვნელოვანი გავლენა აქვს ზოგადად ოთახის ინტერიერსა და რაც მთავარია, მასალების შერჩევის პრინციპზე. მაგალითად, სწორედ სამზარეულოს ნიჟარა გვკარნახობს როგორი ონკანი იქნება საჭირო, როგორი სანტექნიკა, ნიჟარის ავეჯის სიღრმე და რაც მთავარია, რა მასალა უნდა იყოს ზედაპირი. იმის გათვალისწინებით, რომ სამზარეულოს ნიჟარების მრავალფეროვანი არჩევანი არსებობს, მისი შერჩევისას, საჭიროა გავითვალისწინოთ ზოგადი ინტერიერის დიზაინის სტილი, რათა ჩვენი არჩევანი ერთიანი იერსახიდან ამოვარდნილი არ იყოს. 

გარდა ამისა, არ უნდა დაგვავიწყდეს, რომ სამზარეულოს ნიჟარა, ვიზუალურ მომხიბვლელობასთან ერთად, ჩვენი მოხმარების ჩვევებსა და საჭიროებებსაც უნდა შეესაბამებოდეს. ამიტომაც, იმისათვის, რომ არჩვეანის გაკეთება გაგიმარტივოთ, ამ ბლოგის დახმარებით, თქვენთვის იდეალური ნიჟარის საპოვნელად ყველა მნიშნელოვან დეტალებს გაგაცნობთ: 

სამზარულოს ნიჟარა 

სამზარეულოს ნიჟარის შერჩევისას, საკუთარ თავს, პირველ რიგში, 3 მნიშვნელოვანი შეკითხვა უნდა დავუსვათ:

1) რა ტიპის ინსტალაციაა საჭირო? როგორ დამაგრდება ნიჟარა ზედაპირზე? 

2) რა საერთო კონფიგურაციისა და ზომის ნიჟარაა საჭირო? 

3) რა მასალას ვანიჭებთ უპირატესობას? 

ამ კითხვებზე პასუხის გაცემა, დაგვეხმარება ძებნის არეალის შევამციროთ და ჩვენთვის საჭირო და მოსახერხებელ ვარიანტებზე ვკონცენტრირდეთ. 

ზომა

სამზარეულოს ნიჟარის ზომები ძალიან მრავალფეროვანია და დამოკიდებულია იმაზე, თუ რამხელა სივრცე გაქვთ თქვენ და რა საჭიროებები გესახებათ სამზარეულოს ნიჟარაზე ფიქრისას. 

სტანდარტულად, ყველაზე გავრცელებული შემდეგი ნიჟარებია: 

• ერთგანყოფილებიანი
• ორგანყოფილებიანი
• სამგანყოფილებიანი

როგორც წესი, მათი ზომები, სტანდარტულად, 22-სანტიმეტრიდან იწყება და იშვიათად, თუმცა გრძელმა ნიჟარებმა შესაძლოა მიაღწიონ 220-სანტიმეტრსაც კი. 

თუ ნიჟარის დამონტაჟებას სამზარეულოს კუნძულზე აპირებთ, რათა საჭმლის მომზადების პროცესი კიდევ უფრო გაიმარტივოთ, მაშინ კარგი არჩევანია 60-დან 90-სანტიმეტრამდე ნიჟარა. ვინადაინ, არც ძალიან დიდი სივრცეს იკავებს და მოსახმარადაც კომფორტულია. 

ნიჟარები, რომლის ზომა 75-სანტიმეტრს სცდება, ორ ან მეტ განყოფილებიანია. თუმცა, ისეთ ნიჟარებსაც შეხვდებით, სადაც მხოლოდ ერთი თუმცა დიდი განყოფილებაა წარმოდგენილი. ორ ან სამგანყოფილებიანი ნიჟარა საუკეთესო არჩევანია დიდი ოჯახებისა და ზოგადად, დიდი ფართობის მქონე სამზარეულოს ოთახისთვის. საჭმლის მომზადებისას, ერთ განყოფილებაში ამზადებთ საჭმელს და შესაბამისი საჭიროებებისთვის იყენებს ნიჟარას, ხოლო მეორეში აწყობთ გასარეცხ ჭურჭელს. გარდა ამისა, ორგანყოფილებიანი ნიჟარები ძალიან კარგი გამოსავალია მაშინ, როცა გარეცხილი ჭურჭლის სამზარეულოს ზედაპირზე ან კარადაში მოთავსება არ გსურთ. ასეთ დროს, ნიჟარის შედარებით მცირე ზომის განყოფილებაში ვათავსებთ გარეცხილ ჭურჭელს და ვაცდით, სანამ წყლისაგან სრულად დაიწრიტება და გაშრება. 

როგორც წესი, 90-დან 150-სანტიმეტრამდე ნიჟარა საკმაოდ დიდი ზომის ნიჟარად ითვლება და კარგი არჩევანი სამრეწველო ან პროფესიონალური სამზარეულოების მოწყობისას, სადაც დიდი ოდენობით საკვები ირეცხება, მზადდება და შესაბამისად, ჭურჭელიც ბევრი და მოცულობითად დიდი გაბარიტის გროვდება. 

მასალა

ინტერიერის დიზაინს მოწყობასთან ერთად, მოვლაც სპეციფიკური სჭირდება. ამიტომაც, როცა საქმე სამზარეულოს ნიჟარას ეხება, განსაკუთრებით მნიშვნელოვანია ვიცოდეთ როგორი მასალაა ჩვენთვის კომფორტული. მისი ვიზუალური მხარე და გამძლეობა პირდაპირ იქნება დამოკიდებული იმაზე, თუ რა მასალის ნიჟარას შევარჩევთ. ნიჟარის ესთეტიკური მხარე და მისი მოვლა-შენარჩუნება, რამდენიმე ფაქტორზეა დამოკიდებული. პირველ რიგში კი იმაზე, თუ რამდენად გამძლეა ნიჟარის მასალა ქიმიკატებისა და სხვადასხვა სახეხი მოწყობილობის მიმართ. მაშ, ასე ყველაზე გავრცელებული ოთხი ტიპის მასალაა: 

უჟანგავი ფოლადის სამზარეულოს ნიჟარა 

როგორც ტრადიციული, ასევე თანამედროვე სტილით მოწყობილ სამზარეულოებში, უჟანგავი ფოლადი ერთ-ერთი ყველაზე ფართოდ გამოყენებული მასალაა. მისი დადებითი მხარეებია: 

- მსუბუქი;

- გამძლე;

- კომპაქტური დიზაინი;

- მოსავლელად მარტივი. 

უჟანგავი ფოლადის ნიჟარები მრავალფეროვან არჩევანს გვთავაზობს. ამასთან ერთად, მარტივი და მოსახერხებელია მათი მონტაჟიც. უჟანგავი ფოლადის სამზარეულოს ნიჟარა შესაძლოა დამონტაჟდეს როგორც სამზარეულოს ზედაპირზე, ასევე ზედაპირის ქვეშაც. 

ფაიფურის სამზარეულოს ნიჟარა 

მათთვის, ვისაც ვინტაჟური სტილი იტაცებს, ფაიფური დახვეწილი და ტრადიციული არჩევანია. მისი დადებითი მხარე გახლავთ ისიც, რომ ფაიფურის სამზარეულოს ნიჟარა ძალიან მდიდარია ფერთა არჩევანშიც. თუმცა მათთვის, ვინც ვიზუალთან ერთად მასალის მდგრადობას ძალიან დიდ ყურადღებას აქცევს, გასათვალისწინებელია ისიც, რომ ფაიფურის მასალა ხშირად იჩენს ლაქებს და მასთან ურთიერთობისას შეზღუდული ვართ საწმენდი სითხეების გამოყენებაშიც. 

გრანიტის სამზარეულოს ნიჟარა

გრანიტის სამზარეულოს ნიჟარა დახვეწილ ტონებს მატებს ოთახის დიზაინს. მისი ბუნებრიობიდან გამომდინარე, გრანიტი ამტანია ნაკაწრებისა და ლაქების მიმართ და სწორად მოვლის პირობებში, არ იმჩნევს წყლის წვეთებსაც. 

ბუნებრივი ქვის სამზარეულოს ნიჟარა

ბუნებრივი ქვის სამზარეულოს ნიჟარებს, უმეტესად იყენებენ მაშინ, როცა სურთ, რომ სამზარეულოს ზედაპირის ფერი პირდაპირ ნიჟარის ფერის გაგრძელება იყოს. ამ გზით, ინტერიერში ერთიანობის შეგრძნება იქმნება. თუმცა, ბუნებრივი ქვის შერჩევისას, უნდა გავითვალისწინოთ ისიც, რომ მასალა საკმაოდ ძვირიც ღირს და ამასთან ერთად, სპეციფიკურ მოვლას საჭიროებს.